«Eng faol ijtimoiy xodim» ko‘rik-tanlovi
2024-yil 3-fevralda hukumat tomonidan “Eng faol ijtimoiy xodim” ko‘rik-tanlovini tashkil etish bo‘yicha qaror qabul qilindi.
Mazkur hujjatni qabul qilishdan ko‘zlangan asosiy maqsad Ijtimoiy himoya milliy agentligi tizimidagi ijtimoiy xodimlar, ijtimoiy xodim assistentlari, shuningdek, nodavlat notijorat tashkilotlardagi ijtimoiy xodimlar ongida “Ijtimoiy himoyaga muhtoj aholiga sifatli ijtimoiy xizmat va yordam ko‘rsatish-oliy burchimiz!” konseptual g‘oyasini mustahkamlashdan iborat.
Ko‘rik-tanlov ikki, ya’ni - “Eng faol ijtimoiy xodim” va “Eng faol ijtimoiy xodim assistenti” nominatsiyasi bo‘yicha bo‘lib o‘tadi. Ko‘rik-tanlovda ishtirok etish istagini bildirgan nomzodlar 1-apreldan 30-aprelga qadar ro‘yxatdan o‘tishlari mumkin.
Ko‘rik-tanlov har yili may-iyun oylarida quyidagi bosqichlarda o‘tkaziladi: hududiy saralash bosqichi — may oyida Qoraqalpog‘iston Respublikasi, viloyatlar va Toshkent shahri miqyosida; respublika final bosqichi — iyun oyida hududiy saralash bosqichlari g‘oliblari o‘rtasida respublika miqyosida.
Ko‘rik-tanlov g‘oliblarini aniqlash uchun quyidagi tartibda sinovlar o‘tkaziladi:
1. Bilim darajasini aniqlashga qaratilgan ijtimoiy ish sohasidagi onlayn test sinovlari;
2. IQ va individual psixologik xususiyatlari darajasini aniqlashga qaratilgan sinovlar;
3. Yakka tartibdagi suhbat.
Tanlov g‘olib va sovrindorlari har yilning iyul oyining birinchi haftasida quyidagicha taqdirlanadi: Hududiy saralash bosqichidagi g‘oliblarga mehnatga haq to‘lashning eng kam miqdorining 5, 3 va 2 baravarigacha pul mukofotlari beriladi.
Agar ijtimoiy xodimlar oliygohlarda «Ijtimoiy ish» mutaxassisligi bo‘yicha ta’lim olayotgan bo‘lsa, pul mukofoti bilan birgalikda bir yillik to‘lov-kontrakt summasi ham to‘lab beriladi.
Bunda 1-o‘rin uchun 100 foiz miqdorda, 2-o‘rin uchun 50 foiz hamda 3-o‘rin uchun 25 foizi miqdorida qoplab beriladi. Respublika bosqichidagi g‘oliblarga esa mehnatga haq to‘lashning eng kam miqdorining 20, 15 va 10 baravarigacha pul mukofotlari beriladi.